- BUDAYA BETAWI

Recent Recipes

- BUDAYA BETAWI

Comments (2) |

UJUNGAN, SEMOGA KAGAK ADA UJUNGNYA

25 Juli 2011.

Romananya, sumpamanya kalu anak sekarang ditanya : “tau su’al ujungan apa kagak ?”. Ana yakin, dia cumen melongo, melegeg, godég, nyengir sebaru ngomong dah “…lah, kaaaagak, denger aja baru sekarang”. Mending kalu dia mao balik nanya : “émang ujungan itu apaan si ?”. Itu masi bagus, ampélagi kalu nanyanya sebaru maksa lantaran bener-bener péngén tau. Biasanya, paling banter cumen nyengir doang, udah dah ngeléos. Tapi pagimana lagi, nyeng muda juga kagak bisa disalain, ampélagi nyeng tua, nyeng émang ngeranapin tempo-tempo di mana ujungan masi nyohor ama masi jadi andelan bangat di ilayah orang betawi, ampélagi orang betawi di bekasi utara.

Sebenernya, ana sendiri cumen inget latap-latap sual ujungan ini. Lantaran pas ana mulain gedé, ujungan udah mulain langka. Selaén udah jarang nyeng minta diadain di acara-acara khusus, Ujungan juga udah mulain dilarang, sabab katanya kebiasaan ini bisa nimbulin bahaya buat nyeng maénin ujungan, ditambah lagi katanya pemeréntah setempat juga ngikut latahan dongan cara nerbitin peraturan pemeréntah sual Larangan Ujungan ini (sayangnya, ana belom dapet keterangan sual itu peraturan. Buat mamang-mamang nyeng ada di Pemeréntahan, Ada nyeng tau ?).

“Hampir tidak pernah ditemukan lagi pertandingan seni ketangkasan Ujungan di Jakarta maupun daerah-daerah lain di Jawa Barat. Di Betawi dan sekitarnya sendiri praktis punah setelah pada tahun 1960 pemerintah melarang seni ketangkasan Ujungan ini, karena dianggap permainan yang keras dan sadis” (Ridwan Saidi, Glosari Betawi-iv).

”Sampai tahun 80an, di daerah Babelan dan sekitarnya kita masih bisa menyaksikan Ujungan. Biasanya digelar pada hari-hari besar, seperi pernikahan, perayaan adat dan lainnya. Tapi sekarang nyaris sudah tidak ada”. Kata Herry, salah satu anak jawara Ujungan.

(http://jelajahbekasi.com/?p=707).

Dari sekéan banyak seni ketangkasan di Nusantara nyeng maké unsur beladiri di dalemnya, romananya cumen Ujungan aja nyeng kecatet secara arkeologi. Dalem artefak ama gerabah nyeng ditemuin di Babelan, Bekasi, nyeng ngejelasin su’al udah adanya pemukiman di permulaan abad masehi di daerah itu.

Seni ketangkasan Ujungan merupakan paduan dari tiga macem seni nyeng ada di dalemnya, seni musik (Sampyong), seni tari-silat (Uncul), ama seni bela diri tongkat (Ujungan). Boleh dikata kalu tiga jenis seni ini merupaken seni tertua nyeng pernah ditemuin, bareng ama keberadaan kerajaan Salakanagara (130 M) nyeng berdasar ama naskah kuno Wangsakerta sebagé kerajaan pendahulu kerajaan-kerajaan gedé di Jawa Barat, kemasuk seni beladiri pencak silat, cumen sayang bangat kagak disebutin sual aliran silat apa nyeng dipake.

Dalem naskah kuno Wangsakerta, cumen disebutin sual adanya Aki Tirem Sang Luhur Mulya sebagé pengulu kerajaan Salakanagara nyeng pinter bekelai atawa warakas atawa sakti, kebukti cumen dongan kekuatan 20 orang pasukannya dapet ngalahin 100 orang bajak laut. (Pustaka Rajya-Rajya Bhumi NusantaraI 1:103-104). Titik terang sual aliran silat paling tua nyeng disebutin tadi, baru liwat tulisan sejarawan ama budayawan Betawi, Alwi Shahab, nyeng nyebut Syahbandar pelabuan Sunda Kelapa, yaitu Wak Item nyeng pinter maénin silat aliran Syahbandar tempo ngadepin serangan 1546 pasukan Fatahillah taun 1527, cumen sual ini perlu penelitian nyeng lebih lanjut (http://www.Alwishahab.wordpress.com).

Ampir di sunggal leba di Jawa Barat, kemasuk Banten ama Betawi ditemuin seni ketangkasan Ujungan ini, walipuna dongan nama nyeng laén-laén, ampélagi di luar ilayah ini gé ditemuin kesenian nyeng serupa. Di Cirebon, seni ketangkasan ini cumen disebut sebagé Sampyong. Sampyong, kayak nyeng dikenal dalem seni ketangkasan Ujungan di Betawi ama Bekasi, adalah tabuh-tabuan semacem gambang nyeng dibikin dari kayu nyeng dipotong kasar, artinya kulit di leba luar batang kayu kagak dibuang. Potongan kayu nyeng ukurannya beda-beda itu diiket di tali, kumdian réncéngan potongan kayu itu ditaro di atas dua batang bambu nyeng melintang. Potongan kayu dongan ukuran beda-beda merupaken ukuran tangga nada nyeng diasilin, Mingkin pendek ukuran potongan kayu, mingkin tinggi juga suaranya. Sampyong merupaken waditra, atawa irama seni musik nyeng ngiringin tari bebentuk ibing pencak silat nyeng disebut Uncul. Mingkin lama, perkembangannya di sebagian daerah Jawa Barat kedudukan Sampyong digeser ama gamelan pencak silat nyeng umum. Musik nyeng ngiringin Uncul sama halnya ama musik pengiring pencak silat, semacem tepak dua, paleredan, ama pongpang atawa padungdung. Ampélagi di desa Balerante Palimanan, Cirebon, pimpinan Abah Kasun, cumen maké Genjring Santri dongan cumen maké empat genjring (semacam rebana) ama satu dogdog (bedug) aja.

Ada juga lagi Ujungan (namanya juga sama) nyeng dijadiin tradisi minta ujan nyeng bekembang di kecamatan Somagede, Kabupaten Banyumas, Jawa Tengah, Indonesia. Tradisi taunan ini merupaken olahraga beladiri adu pukul nyeng dilakonin ama sepasang lakian dewasa maké rotan buat alat pukulnya. Ritual nyeng dipimpin ama Wlandang (wasit) ini biasanya diadain pas waya musin kemaro panjang. Di musin ini petani butuh bangat ama aér manting ngaérin sawah-sawahnya juga manting minum binatang piaraannya semacem sampi, kebo, kambing ama nyeng laén-laennya. Katanya, supaya ujan gasik turun, pemaén ujungan di sini kudu bikin banyak pukulan ke lawannya sampé ngeluarin darah. Sumpama mingkin banyak darah nyeng kuar lantaran pukulan, entak-anu mingkin gasik juga ujan bakal turun. Tradisi nyeng diadain pas waya mangsa kapat (ke empat) ama Kamo (kelima) di musin kemaro ini, pemaénnya kudu lakian dewasa nyeng bisa nahan sakit lantaran kepukul rotan atawa nahan sakit pas bebenturan ama lawan.

Kalu kata orang-orang situ, tradisi ujungan ini nimbul dari sebelon Belanda dateng ke Indonesia. Di waya itu, tujuan diadainnya tradisi Ujungan adalah buat minta ujan ama Tuhan. Cumen, lantaran waya itu Indonesia dijajah Belanda, mangkanya tradisi Ujungan ini kumdian dijadiin sebagé sarana latian beladiri manting membina mental ama fisik para pejuang. Tradisi ini juga dikit banyaknya ngikut ngelahirin pejuang-pejuang bangsa nyeng pemberani. Kumdian pada taun 1950-an, tradisi Ujungan bekembang sebagé ajang nyari juwara beladiri. Sapa-sapa nyeng bisa ungkulan menangin pertarungan Ujungan ini, status sosialnya di masyarakat bakal naék. Lantaran itulah banyak orang nyeng minat jadi pemaén Ujungan, baék dari Banyumas atawa juga daerah-daerah laén di sekitarnya.

Tradisi ini didemenin ama juwara silat dari leba Betawi, Tanjung Priok, Cakung, Tambun, Cikarang ama laén-laénnya. Seiring ama jalannya waktu, tradisi Ujungan cumen bekembang jadi seni pertunjukan hiburan biasa. Walipuna begono, ketentuan-ketentuan peraturan maénan Ujungan masi tetep angger nginduk ama Ujungan jaman awal nimbulnya tradisi ini, baék rotan nyeng dipaké buat alat mukul atawa juga Wlandang pertunjukan. Rotan nyeng dipaké kudu punya tingkat kelenturan nyeng cukup baék, dongan panjang kira-kira 40-125 cm ama diameter kira-kira 1,5 cm. ketentuan rotan nyeng disyaratin kayak ini punya tujuan buat ngurangin rasa perih sumpama disabétin ke badan. Kalu Wlandang, dia kudu punya keterampilan élmu beladiri nyeng tinggi. Ini dimaksudin yagén bok-bok salah satu pemaén Ujungan kagak puas ama asil keputusan wasit lantas entak-anu mao nyoba ngelawan wasit, wasit juga kudu berani nerima tantangan itu.

Ujungan merupaken tradisi nyeng nggabungin tiga jenis seni, yaitu seni musik (sampyong), seni tari-silat (Uncul) ama seni beladiri tongkat (Ujungan). Keistimewaan laén nyeng ada dalem tradisi Ujungan adalah adanya sikap ngejunjung tinggi niléi sportivitas, persodaraan, rasa nasionalisme ama semanget patriotisme sebagé generasi penerus bangsa.

Sampyong

Pertunjukan Ujungan selalu diiringin ama tabuh-tabuhan nyeng disebut Sampyong, semacam gambang nyeng dikeja dari kayu nyeng dipotong-potong. Mingkin pendek ukuran potongan kayu, mingkin tinggi juga suaranya. Potongan kayu ini kumdian diatur di atas bambu melintang. Nada Sampyong ini rada nyanter lantaran merupaken asil dari suara nyeng dipantulin ama bambu nyeng melintang itu.

Uncul

Seni tari-silat Uncul adalah pertunjukan pendahuluan sebelon Ujungan dimulain. Uncul merupaken wiyaga, atawa pengibing (pertunjukan pengiring sebelon pertandingan) pencak silat nyeng ngawalin dibukanya laga tanding seni ketangkasan Ujungan. Pemaén Uncul merupaken pemaén pertama nyeng bakal belaga di Ujungan. Wiyaga ngerangkep jadi pemaén, lantaran sering wiyaga nyeng ngunjukin ibing pencak silatnya jalan ngider ke arah penonton sebaru nantang. Kalu ada orang nyeng masup nerima tantangan, kumdian Ujungan bakal dimulain. Penonton nyeng mao jadi lawan pemaén Uncul merupaken calon pemaén kedua dalem pertandingan Ujungan. Penonton nyeng nerima tantangan itu kumdian masup ke dalem arena pertunjukan, tapi kalu kagak ada nyeng nerima tantangannya, entak-anu wiyaga tadi bakal keluar. Begono seterusnya sampé ada seorang petarung nyeng dianggap sebagé juwara Ujungan sumpama kagak ada lagi nyeng berani nantang.

Ujungan biasanya dimaénin ama sepasang lakian dewasa, tapi kagak jarang juga dimaénin ama lima pasang pemaén baren-bareng. Tradisi ini juga punya peraturan-peraturan permaénan nyeng kagak boleh diléngkar. Peraturan itu contonya, pemaén Ujungan cumen dibolehin mukul pas leba pinggang ke bawah kacawali pas leba kemaluan. Sasaran pukul nyeng disaranin adalah tulang kering ama mata kéok. Maksudnya supaya para peserta Ujungan kagak dapet cidra nyeng nyilakain. Kemenangan dalem pertarungan ini diniléi dari banyaknya bekas luka nyeng bebekas di badan. Kalu mingkin banyak bekas pukulan nyeng bebekas di badan itu pemaén, romannya itu pemaén bisa dikata bakalan kalah (http://www.wisatamelayu.com).

Ujungan

Ujungan merupaken acara puncak dari tiga rérodan kesenian nyeng ditampilin dari seni ketangkasan Ujungan. Seni ini nimbul dari kebiasaan juwara silat pas wayanya milih ama nyaring sapa-sapa nyeng paling ungkulan. Ada juga nyeng ngarti’innya sebagé pertandingan antara juwara silat dalem ngadu kekedotan badan, supaya dapet tempat ama status sosial di masyarakat. Juwara-juwara nyeng belaga ditatab ngadu pukulan tungked rotan maké silat dari “maénannya” déwék-déwék, ujungnya bakal diambil satu juwara nyeng paling dikit dapet pukulan ama paling banyak mukul atawa dapet ngungkulin lawannya. Cumen belakangan, Ujungan kagak lagi dipaké buat nyaring juwara nyeng paling ungkulan, tapi cumen jadi hiburan rakyat doang.

Dalem khasanah ilmu beladiri moderen, Ujungan bisa dimasupin ke dalem rambuan Seni bela diri bertongkat atawa nyeng dikenal stick fighting nyeng diarti’in seni bela diri tongkat, tumpul, senjata genggam, nyeng semuanya dibikin dari bahan kayu atawa semacemnya buat keperluan pertarungan semacem toya (tungked panjang), tungked buat alat bantu manula, stick sepanjang 40-70cm atawa nyeng semacemnya (Wikipedia Indonesia).

Di Bekasi déwék, ada Ki Dalih (83 tahun) atawa congga dipanggil Baba Dalih, praktisi ama mantan juwara Ujungan Betawi di taun 50-an. Pertandingan Ujungan nyeng beliau pernah ikutin seputeran leba Cakung, Tanjung Priok, Tambun, Cikarang ampé kria’an taunan Pehcun di Tanggerang. Maké andelan aliran silat Pi Atu nyeng dipelajarin dari Uwak H. Beton, Ki Dalih ama almarhum H. Raisan (sesepuh Bojong Rawalele) sempet ngerajain laga Ujungan di Betawi ampé sekupengannya. Bekes-bekes anteman ujung rotan lawannya di tulang kering Ki Dalih masi danta keliétan (http://njowo.multiply.com/journal/item/206).

ALAT NYENG DIPAKÉ

Tungked

Tungked nyeng dipaké kapranya maké rotan tapi ada juga nyeng make batang tebu, kayak nyeng dipaké ama Sanggar Lam Alif di Cirebon. Ukuran panjang rotan Ujungan punya ukuran macem-macem, kagak ada ukuran baku dari rotan nyeng dipaké. Ukurannya kira-kira 40-125 cm, kapranya di daerah Betawi ama sekiternya maké rotan be’ukuran 70 cm, dongan diameter segede lengen orok (-/+ 1,5cm). Rotan nyeng dipaké kudu dipilih nyeng bener-bener cakep (cakep artinya bisa diliét dari pagimana lengkungan rotan pas dipukulin ke kaki atawa awak lawan), polos kagak dilapisin apa-apa manting tempat pegangan. laén ama waya-waya mulain nimbulnya Ujungan nyeng mana ujung rotan sengaja dilapisin ama peca’an batu atawa logam nyeng niatnya supaya bisa bikin lawan luka. Di laén-laen tempat di Cirebon, rotannya sering juga diselipin behel atawa selembar barang nyeng dipaké manting jimat (kapranya dibikin dari kulit kijang, kulit macan, kaén atawa kertas nyeng diselipin rajah atawa isim nyeng dipercayain bisa ngelindungin atawa ngurangin berasa sakit taro-kata kepukul).

Boboto/Juru Garis/Wasit

Adanya Wasit/Juru Garis atawa nyeng di Betawi ama sekupengnya disebut Boboto diperluin bangat, kapranya Boboto diambi dari sesepuh nyeng punya disegenin di leba situ. Boboto juga kudu bisa silat nyeng maénannya rada lebih dibandingin nyeng laén. Biasanya dipilih dari guru-guru silat. ini emang diperluin bangat lantaran orang-orang nyeng belaga kebanyakan juwara, jadi supaya bisa ngedombanin bok-bok juwara-juwaranya kagak kedombanan entak-anu jadi pada bekelai beneran.

Boboto mimpin pertandingan sebaru maké tungked nyeng lebih panjang. Tungked dipaké manting ngeja garis di tanah nyeng jadi bates ringgenan lapangan tempat belaga, itu tungked juga bisa dipaké buat misahin peserta nyeng lagi belaga. Di laén-laen tempat ada juga Boboto nyeng maké selendang panjang buat alatnya.

Aturan Pertandingan Ujungan

Pertandingan nyeng diadain di Betawi ama sekiderannya, nyeng udah-udah biasanya dilakonin ama dua orang juwara, tapi ada juga maké sampé lima jawara sekalian. Dua jawara nyeng pada be’adepan musti beda kampung ama sama-sama kagak kenal, artinya kagak ada sangkutan apa-apa. Dua-duanya juga kudu belon-tau amprokan di pertandingan-pertandingan sebelonnya. Ini dimaksudin supaya jangan sampé ada dendem, ampélagi buat juwara nyeng udah-tau kalah sebelonnya.

Arena Pertandingan Ujungan

Arena pertandingan adanya di tanah nyeng dibikinin garis make tungked Wasit atawa Boboto. Bentuknya kagak ada aturan nyeng danta, bisa jadi bunder atawa kotak. ukurannya 5-10 meter diliét dari lebar tanah nyeng dipaké. Juwara nyeng kuar dari garis arena bisa ngurangin itungan, bisa jadi dianggep kalah. Kuar garis arena juga dianggep nyerah atawa kagak mao nerusin pertandingan.

Sasaran pukul

- Daerah Betawi ama sekiderannya punya aturan sasaran, nyeng boleh dipukul di leba depan awak adalah dari pinggang ke bawah, kacuali leba kemaluan. Sasaran nyeng paling diincer yakni tulang kering ama mata kéok lawan, baék nyeng kanan atawa nyeng kéré. Di leba laén di Jawa Barat cumen kaki sebates dengkul nyeng jadi inceran. Peserta dibolehin milih, make baju atawa telanjang.

- Sikut sampé ujung geriji dari tangan nyeng megang tungked.

- Leba awak belakang, pundak ke bawah buat lawan nyeng lari ngindarin balesan.

- Bekes pukulan di awak atawa kaki nyeng disebut “balan”, nentuin bangat menang kalahnya si juwara dalem pertandingan. banyaknya balan di’itung Boboto dari sunggal juwara nyeng betanding manting nentuin nyeng menang.

Ukuman dari Pelanggaran

- Di’ingetin kenceng, sumpamanya, mukul leba sekiter kemaluan, pala ama nyolok mata maké tungked.

- Dikuarin dari arena pertandingan.

- Dinyatain kalah.

- Dilarang ngikut pertandingan lagi kapan ama dimana aja (masyarakat nyeng ngdombanin seni ini pada jadi saksi ama pengamat di pertandingan selanjutnya).

- Juwara belon bisa dikata kalah sumpama tungketnya kontal, pas ini waya, pencak silat tangan kosong dipaké. Selanjutnya, kekalahan ditentuin dari sapa nyeng lebih duluan jatoh duduk.

Pelestarian Seni Ketangkasan Ujungan ini mustinya perlu jadi perhatian manting nyeng pada demen ama nyeng pada ngelakonin silat tradisional, sabab kalu ngingetin umur Ujungan itu déwék nyeng ngelebi’in adanya aliran pencak silat paling tua di Betawi ama Jawa Barat khususnya ama Indonesia jamaknya. Bedasar dari pemikiran itu, pantes apa kagak kalu seni ketangkasan Ujungan ini disebut bongkotnya pencak silat……?

Ujungan sekarang udah kagak ada lagi. Kagak ada usaha dari Pemeréntah buat ngidupin ama ngelestari’in Ujungan lagi. Sabab, Ujungan pada dasarnya nanemin semanget sportivitas ama rempugan. Selaén itu juga punya gerakan-gerakan cakep maénan tungked, mingkin sedep lagi lantaran diiringin ama tabuh-tabuan. Ujungan, ni ari udah sirep, kegusur ama bela diri nyeng dateng dari luar negeri macem Karate, Taekwondo, Wushu, Capoerra ama nyeng laén-laén.

Ni ari, kalu mao diubek, masi ada orang-orang tua nyeng bisa ditanyain sual Ujungan ini, dan ana yakin, beliau-beliau juga masi mao ngajarin sumpama ada orang-orang muda nyeng bener-bener niat péngén belajar, ampélagi kalu niatnya manting diturunin ke nyeng laén. Ana juga yakin, kalu kita mao, Ujungan juga bisa dibangunin lagi. Kalu émang cumen pekara kerasnya itu maénan, semuanya bisa diakalin. Contonya, kalu alat nyeng dipaké dulunya dari rotan, sekarang bisa diganti ama bahan nyeng lebih empuk ama kagak bakalan bikin luka nyeng bisa bikin cilaka atawa ninggalin bekes di awak, cumen jogrogannya kudu tetep sama ama nyeng aslinya. Itu kalu buat tujuan ngelestariin budaya sumpamanya mao ditanggap di acara-acara khusus, ukan kayak jaman dulu nyeng niatnya buat nyari atawa nyaring juwara. Romananya, kalu mao diantegin dari waya gini, semuanya masi bisa kecandak, kagak tau dah kalu lima atawa sepuluh taun ke depan.

Ujungnya, kagak ada niat laén ngumbar ini tulisan. Cumen atu arepan, Ujungan kagak bener-bener kalis bangat dari bagéan budaya orang betawi, ampélagi kalu ada nyeng tegerak atinya buat ngebangunin lagi Ujungan nyeng masi tidur di dalem gerobog pangkéng kumpi-kumpi…

ENTUKAN :

1. Disaring dari banyak entukan, sumpama contonya nanya-nanya ama Ki Dalih di Bekasi (nyeng ngelakonin Ujungan ama Jawara Silat aliran Pi Atu Betawi taun 50-an) (http://njowo.multiply.com/journal/item/206).

2. Ridwan Saidi, Glosari Betawi-iv

3. Wikipedia Indonesia

4. http://www.wisatamelayu.com

5. http://www.Alwishahab.wordpress.com

6. http://jelajahbekasi.com/?p=707

7. http://njowo.multiply.com/journal/item/206

8. http://sosbud.kompasiana.com/2010/04/11/maen-ujungan/